BAGUIO CITY – Madanagan ti Baguio City Police Office iti posible a panagngato ti kaso dagiti maibatbati a maladaga ken fetus iti siyudad ita a tawen.
Maibasar iti datus ti Women and Children Protection Desk ti opisina, nairekord ti tallo laeng a kaso ti abandoned baby ken fetus idi napalabas a tawen bayat nga iti umana a quarter iti agdama a tawen ket dimmanonen ti tallo a kaso.
Manipud iti tallo a kaso idi napalabas a tawen, dua kadagitoy ket fetus bayat a maysa ket maladaga nu sadino nasarakan dagitoy iti maysa a compound idiay Military Cut-off ken Lower Quarry barangay, Baguio City.
Iti nasao a kaso, maysa laeng kadagiti suspek a nangibati ti anakna a maladaga ti nabigbig nu sadino maisagsaganan ti criminal case kontra kenkuana.
Ita met a tawen, napasamak ti umuna a kaso ti abandoned baby idiay Loakan Proper idi Enero, bayat a nasarakan ti fetus idiay Melvin Jones comfort room ken maysa a maladaga idiay Baguio City Cathedral iti agpada nga aldaw idi Marso.
Agtultuloy met ti panagsapol dagiti maseknan nga operatiba kadagiti suspek nga adda iti likodan ti panag-abandona kadagiti maladaga iti agdama.
Kabayatanna, dagiti maladaga a naabandona ket naiturong iti sidong ti Reception and Study for Children Center iti Department of Social Welfare and Development.
Maisagsagana metten dagiti papeles dagitoy para iti adoption.
Iti interview ti Bombo Radyo kenni PMaj. Harriet Bulcio, pannakangiwat ti Baguio City Police Office, inaklonna a marigatanda a mangbirok kadagiti nagannak ken nangibati kadagiti fetus ken maladaga gapu ta sumagmamano kadagiti nangibatyanda ket awanan ti CCTV, ken narigat a bigbigen dagiti nangibati gapu ta naillemmeng dagiti rupa dagitoy.
Nupay kasta, impasigurado ni PMaj. Bulcio nga agtultuloy ti panangbiruk ken panangbigbigda kadagiti nagannak ken nangibati kadagiti maladaga ken fetus a nasarakan iti siudad para iti kaskenan a pannusa.//Bombo Jez Lapizar
