BAGUIO CITY- Saan a kankanunungan ti Alliance of Concerned Teachers Cordillera ti posibilidad a pannakaisubli ti Reserve Officers’ Training Corps (ROTC).
Iti panakiuman ti Bombo Radyo Baguio, kinuna ni Jeanette Cawiding, dadaulo ti nasao a grupo, saan a solusyon ti ROTC iti panakadisiplina dagiti estudyante.
Impettengna a ti kinakurang ti disiplina ti maysa nga indibidual ket agdependar iti sitwasyon ti pagilian.
Inyarig ni Cawiding ti sitwasyon kabayatan ti pandemya nu sadino adda latta dagiti tattao a rumwar iti pagtaengan nupay naiparit daytoy gaputa nasken nga agbirukda iti trabaho ken taraon.
Agtalek ni Cawiding a ti disiplina ken napintas a panag-ug-ugali ket addan iti maysa a tao nu sadino agdependar kenkuana nu aramatenna daytoy wenno saan.
Gapu iti daytoy, impaganetgetna a nasaysayaat nu ti maisuro kadagiti estudyante ket ti panagbalinda a nasyonalismo.
Maipalagip a naipasardeng ti mandatory ROTC program iti pagilian idi 2002 kasaruno ti pannakaipasa ti Republic Act 9163 wenno ti National Service Training Program (NSTP).
Naipasa ti nasao a linteg kasaruno ti panakapapatay ti maysa nga estudyante ti University of Santo Tomas a ni Mark Wilson Chua gapu iti maatap a panangibutaktakna iti corruption activity ti ROTC handlers daytoy.
Nupay kasta, itay laeng nabiit ket inwaragawag ni Vice President-elect Sara Duterte ti panangisakadna iti ROTC para kadagiti amin a Pilipino nga agtawen iti 18-anyos.
