BAGUIO CITY – Manamnama nga agkita manen da Pres. Rodrigo Duterte ken Vice President Leni Robredo iti commencement exercises ti Philippine Military Academy (PMA) SALAKNIB Class of 2017 ditoy siudad ti Baguio inton bigat.
Iti maikadua a gundaway ket agsarak ti dua a top officials ti pagilian kalpasan nga imikkat ni VP Robredo manipud iti gabinete ni Pres. Duterte idi Disyembre gapu iti “irreconcilable differences” dagitoy.
Immunan a nagkitada iti Legislative Executive Development Advisory Council meeting sadiay Malacañang idi Enero.
Agserbi ni Pres. Duterte kas guest of honor and speaker iti panagturpos dagiti 167 a kadete ti PMA Class of 2017 nga idadauloan ni Cadet First Class Rovi Mairel Martinez.
Ipaay met ni VP Robredo ti Vice Presidential Saber kenni Cadet First Class Philip Modestano Viscaya a salutatorian ti graduating class.
