Kiniddaw ni President Ferdinand Marcos Jr. a rumbeng a masurot ti linteg ken umno a proseso iti impeachment trial kontra kenni Vice President Sara Duterte.
Sigun kenni Palace Press Officer Usec Claire Castro, ti panagtungpal iti linteg ken ti naituding a proseso ti impeachment trial ti kakaisuna a kiniddaw ni President Marcos Jr.
Impetteng ni Atty. Castro a maibasar iti makitkita ken mabasbasada, nasayaat ti taray ti impeacment trial ken masursurot ti umno a proseso ti impeachment court .
“Ang hiling naman po ng Pangulo sa lahat ng pagkakataon ay sundin ang batas at ang proseso. Sa nakikita po at nababasa rin po natin ay naipapakita naman na nagiging maayos po ang daloy ng hearing sa Senado,” sigun kenni USec. Claire Castro.
Kabayatanna, nagkedked ti Malacañang a mangipaay iti komento seknan kadagiti ebidensiya nga imparang ti prosecution iti maikadua ken maikatallo a trial.
Sigun iti Palasyo, saan a mandato ti Malacañang a sukimaten dagitoy bayat nga agtultuloy ti impeachment proceedings.
