Nakagun-od ni President Ferdinand Marcos Jr. iti baro nga investment commitments manipud kadagiti Canadian firms kabayatan ti panagbisitana sadiay Vancouver, Canada.
Sigun kenni President Marcos Jr., maragsakan a mangipadamag a dagitoy nga engagements ket addaan iti advanced concrete commitments ken investment opportunities, partikular iti benneg ti panagminas kadagiti kritikal a mineral, IT, BPM, business processing, ken dadduma pay nga industria.
Babaen iti daytoy, mapaadu ti trabaho ken ad-adda a nasayaat ti pamasrekan, maaddaan iti napintas a panagbiag dagiti Pilipino, napigpigsa nga ekonomiya ken dadduma pay.
Sigun iti report, naituding nga ag-invest ti Canadian gold and copper producer OceanaGold iti $1.9 billion wenno katukadna ti agarup P106.4 billion tapno mapalawa ti operasion daytoy iti panagminas iti Nueva Vizcaya ken ti posible a pannakapalawa ti operasionda agingga iti 2037.
Nakipagkita metlaeng ni President Marcos kadagiti ehekutibo ti B2Gold a panggepna nga ag-invest iti $14 million wenno agarup P784 million tapno mapalawa ti solar power plant a mangsupsuporta iti Masbate Gold Project.
Kabayatanna, binigbig ni President Marcos Jr. ti kontibusion dagiti Filipino community sadiay Vabcouver, saan laeng a para iti ekonomiya ti Pilipinas no diket karaman metlaeng ti panangpatibkerda iti global reputation dagiti Pilipino.
