Nagkiddaw ti suporta ni President Ferdinand “Bongbong” Marcos Jr. ken ti inyendorsona a senador iti sidong ti Alyansa Para sa Bagong Pilipinas kadagiti botante iti Davao del Norte—maysa a pagaammo a balwarte ni sigud a President Rodrigo Duterte ken Vice President Sara Duterte.
Nakipaset ti campaign rally idiay Carmen Municipal Park and Plazada ni sigud nga Interior Secretary Benhur Abalos, outgoing Makati City Mayor Abby Binay, da Senador Ramon “Bong” Revilla Jr., Lito Lapid, ken Francis Tolentino, ACT-CIS party-list Rep. Erwin Tulfo, ken sigud a senador Manny Pacquiao ken Vicente “Tito” Sotto III.
Saan met a nakipaset dagiti senador a kakaduada a kas kenni Senador Imee Marcos ken Pia Cayetano, sigud a Senador Panfilo “Ping” Lacson, ken Las Piñas Rep. Camille Villar.
Daytoyen ti maikatlo a kampania ti nasao a grupo kalpasan ti campaign rally dagitoy idiay Laoag City, Ilocos Norte ken Iloilo a maikonkonsidera a nabaknang iti botos iti Luzon ken Visayas.
Sigun iti campaign manager ti Alyansa Para sa Bagong Pilipinas ken Navotas City Rep. Toby Tiangco, panggep ti kampaniada a maidatag ti platapormada kadagiti tattao, sadinno man ti ayanda.
Patien met ni Sotto a makaalada ti botos idiay Mindanao kalpasan a naidatagda dagiti platapormada.
Sigun met kenni Tulfo, uray saan ida nga inendorso ti pamilia ti Duterte, maipakpakita iti track record da a nasayaat ti performance da kabayatan ti termino ti sigud a Presidente.
