BAGUIO CITY – Kontrolado itan ti presensia ti African Swine Fever (ASF) kadagiti sumagmamano a lugar iti rehion Cordillera.
Impannakkel daytoy ni Department of Agriculture (DA) – Cordillera Regional Director Cameron Odsey iti panakiuman ti Bombo Radyo Baguio.
Sigun kenkuana, babaen daytoy iti agtultuloy a programa ti DA, dagiti maseknan nga ahensia ti gobyerno ken lokal a gobierno tapno respondean ti panagraira ti virus ken malapdan ti nakarkaro pay a panagwaras ti nasao a sakit kadagiti baboy.
Kinunana a maipatpatungpal ti program of control and surveillance tapno maamuan a dagos ti sitwasyon dagiti baboy iti tunggal munisipyo.
Inlawlawagna a maiyaplikar daytoy a proseso ti programada kadagiti lugar nga addaanen ti impeksion ti ASF virus ken ditoy nga isingasingda ti saan pay a panagtaraken iti baboy dagiti maseknan iti las-ud ti uppat agingga innem a bulan.
Kinunana a kasapulan nga iti uneg ti nasao a panawen ket madalusan ken ma-aplikaran ti disinfectants dagiti kulongan ti baboy ken kalpasan ti nasao a panawen ket mangipaay ti DA iti maysa a baboy a mataraken iti nasao a kulongan a maobserbaran iti uneg ti kanayonan nga uppat a bulan.
Sigun kenkuana, no agballigi ti nasao a panagtaraken ket kaipapananna a natalgeden ti lugar manipud iti ASF ken mabalin nga agtaraken manen dagiti hog raisers nga isu met ti pakaipatungpalan ti repopuation wenno panangpa-ado kadagiti taraken a baboy.
Dinakamatna a maipapaayan iti indemnification fund dagiti apektado a mannalon nga adda iti listaan ti lokal a gobyerno ken ditoy a mabayadan iti sag-P5,000 ti tunggal baboy a napapatay gapu iti ASF.
Puntirya met ti ahensia a makontrol a dagus ti ASF virus kadagiti lugar a nakaduktalan dagiti baro a kaso babaen iti panagalada ti sample ken no nakumpirmar ti presensia ti ASF virus ket kapilitan a mapapatay dagiti baboy a karaman iti kagudua a kilometro ti kaadayona manipud iti naimpeksion a dingwen.
Iimbinglay pay ni Dr. Odsey nga ipapaayanda iti disinfectant dagiti lugar a saan pay a naapektaran ti ASF ken imbilinda ti panakaipawil ti iseserrek ti sabali a dingwen iti maskenan a lugar babaen iti naingetan a border checkpoints.
Nupay kasta, inaklon latta ti dadaulo ti DA-Cordillera ti posibilidad nga agtultuloy ti panakaiwaras ti ASF ditoy rehion iti baet ti panagresponde ti DA, dagiti maseknan nga ahensia ti gobyerno ken lokal a gobyerno.
Inlawlawagna a maysa a rason iti daytoy ti lokasion ti rehion, ti kaado ken naggigiddan a kaso ti impeksion dagiti sakit kadagiti baboy.
Kinuna pay ni Odsey nga ita ket agarop amin a probinsia ti Cordillera ket nakailista iti kaso ti ASF kalpasan ti kaudian a panakaduktal ti sakit sadiay Abra babaen kadagiti alingo a nagtaudan dagitoy.
