BAGUIO CITY – Mapapati nga addan iti siudad ti Baguio ti presensia ti baro nga Omicron variant ti COVID-19.
Sigun kenni Mayor Benjamin Magalong, makita daytoy iti agdama a sitwasyon dagiti kaso ti COVID-19, pakairamanan dagiti sintomas ken kondisyon dagiti nakaptan iti nasao a sakit ken dagiti dadduma a pagilasinan.
Kinunana nga addan ti community transmission wenno panagwaras ti Omicron variant iti lokalidad nupay awan ti opisyal a deklarasyon wenno kumpirmasyon manipud iti Philippine Genome Center.
Imbinglayna a dagiti agdama a sintomas dagiti pasyente iti siudad a nakaptan ti COVID-19 ket kapada dagiti sintomas a narikna dagiti kabagianna ken dadduma pay a nakaptan ti nasao a virus sadiay Amerika.
Maibasar iti rekord ti City Health Office, nailista ti Baguio idi Sabado, Enero 15 ti kangatuan a kaso ti COVID-19 iti uneg laeng ti maysa nga aldaw a dimmanon iti 613.
Nangatngato daytoy no iti 516 a kaso a nailista idi Enero 13,
iti 563 a kaso a nailista idi Enero 14, iti 586 a kaso a nailista idi Enero 16, iti 535 a kaso a nailista idi Enero 17 ken iti 411 a kaso idi September 18, 2021.
Kaaduan kadagiti nagpositibo iti COVID-19 ket awanan ti sintomas bayat nga adda dagiti mild cases.
Pattapattaen pay ti Contact Tracing Czar a posible a dumanon iti 500 ti innaldaw a kaso ti COVID-19 iti siudad bayat a pattapattaenna a dumanon iti 9,000-10,000 ti mailista nga aktibo a kaso sakbay a bumaba iti umuna wenno maikadua a lawas ti Pebrero.
