Inkari ni President Ferdinand Marcos Jr. nga agtuloy ti panagsuporta ti administrasyon daytoy iti panagipasigurado a dagiti biyag dagiti Pilipino ket sumayaat.
Maibasar iti video statement ni President Ferdinand Marcos Jr., simmayaat iti 6.3% ti economic growth ti pagilian iti maikadua a kwarter ti agdama a tawen kasta met a bimmaba iti 3.1% ti unemployment rate ken ti poverty rate iti 15.5%.
Nu pay kasta, kinuna ni President Marcos Jr. nga iti laksid a mayat ti datos ket awan ti serserbi daytoy nu saan a marikna dagiti Pilipino.
Gapu iti dayta, impasiguradona nga agtuloy ti panag-investda kadagiti job-generating infrastructure, social protection programs, salun-at ken edukasyon.
Ti video statement ni Marcos Jr. ket naipablaak kalpasan ti panangiruar ni Vice President Sara Duterte iti statementna a mangbabbabalaw iti gobyerno gapu iti kinakurang ti aksyon dagitoy kadagiti ado a pakaseknan ti pagilian kasta met ti panagbalin a “disloyal” dagiti opisyales kadagiti insapatada a responsibilidadda.
