Impeksa ni sigud a President Rodrigo Duterte a ‘sibubukel ken ligal’ a responsibilidadna ti kampanya daytoy a “war on drugs.”
Daytoy ket iti tengnga a saanna a kayat a dumawat ti dispensar seknan iti nasao a banag bayat ti administrasion daytoy.
Sigun iti sigud a presidente bayat ti panagdinggeg itay laeng agsapa ti Senate blue ribbon subcommittee, kayatna a daytoy ti agbalin a responsable iti amin nga inaramid dagiti kameng ti pulisia kas maitunos iti pammilinna.
Kinunana pay a saanna a kayat a maibalud dagiti kameng ti pulisia gaputa kaasi dagitoy ken mangmangged laeng dagitoy.
Inlawlawagna a naipatungpal ti nadara a drug war tapno masalakniban dagiti Pilipino, ken inkagumaanna a risuten ti parikut ti pagilian maipapan iti iligal a droga a sititibker ken awan ti kompromiso a mapasak.
Dinakamat pay ti sigud a presidente a numan pay agbalin daytoy a maysa nga empleyado ti gobierno wenno simple nga umili, aramidenna latta ti amin tapno masalakniban ti Pilipinas, komunidad, ken dagiti ubbing nangruna iti panagkontra ti iligal a droga.
Kabayatanna, impeksa met ni sigud a chief presidential counsel, Atty. Salvador Panelo a saan nga iligal ti napasamak a ‘war on drugs’ ni sigud a President Duterte.
Kinunana nga inaramid laeng ni sigud a president Duterte ti pagrebbenganna kas presidente tapno masalakniban dagiti Pilipino kontra iti maiparit nga agas.
