Impeksa ti Presidential Anti-Organized Crime Commission nga agaplikar dagitoy iti blue notice iti International Criminal Police Organization wenno Interpol kontra kenni sigud a Bamban, Tarlac Mayor Alice Guo tapno malimitaran ti panaggaraw daytoy.
Ti Interpol blue notice ket maipapan iti panakakolektar iti kanayunan nga impormasyon maipapan iti identidad ti maysa a tao, ti lokasyon ken aktibidad daytoy kas mainaig iti maipatpatungpal a criminal investigation.
Sigun kenni Presidential Anti-Organized Crime Commission spokesperson Dr. Winston Casio, maatap nga adda pay laeng ni Guo sadiay Batam, Indonesia.
Innayon ni Casio a maatap a nagsinabali ti lugar nga ayan da Guo ken ti kabsat daytoy a ni Wesley Guo kalpasan a naarestar ni Shiela Guo ken Cassandra Li Ong itay nabiit.
Kabayatanna, impeksa ti Presidential Anti-Organized Crime Commission ti kapateg ti panakaisubli ni Guo iti pagilian agsipud ta nasken a sangoenna dagiti kaso daytoy a pakairamanan ti human trafficking, tax evasion ken daduma pay.
