BAGUIO CITY – Inadaptar ti rehion Cordillera ni Presidential Adviser on the Peace Process Jesus Dureza.
Kasaruno daytoy ti panakaideklarana nga ‘anak’ ti Cordillera iti naangay nga adoption ceremony kabayatan ti 30th Foundation Anniversary ti rehiyon ken naipaayan ti nagan a “MANSAPIT”.
Naamuan a ti “Mansapit” ket pannarita iti Kankana-ey a kaipapananna ket ‘peacemaker’.
Kinunana a nalaus ti ragsak ken panagyamanna nangruna ta daytoy ti kaunaan a gundaway nga adda ti nangadaptar kenkuana a maysa a lugar.
Naipaayan pay ti Presidential Adviser on the Peace Process (OPAPP) Secretary iti bukodna a baag, kalasag ken gangsa.
Kabayatanna, naminsan manen nga impeksana ti panangsuportarna iti House Bill 5343 wenno ti panagbalin ti Cordillera nga autonomous region.
Kinunana a daytoy a mismo ti nakisarita kenni Presidente Rodrigo Duterte tapnu ipaayan daytoy iti panawen dagiti opisyales ti Cordillera a mangipalawag kadagiti linaon ti gakat a linteg.
Innayonna a gapu iti daytoy ket agturong sadiay Malacañang dagiti opisyales ti rehiyon inton July 25 tapnu personal a kasaritada ni Presidente Duterte.
Kinuna pay ni Dureza a posible met a maysa ti rehion Cordillera kadagiti ipaayan ti atension ni Presidente Duterte iti maikadua nga State on the Nation Address (SONA) daytoy inton July 24.
