Inlawlawag ni presiding officer ken Senator-judge Francis ‘Chiz’ Escudero ti pannakapilina kas presiding officer iti Senate impeachment court.
Sigun kenkuana, saanna a kinayat, saanna a kiniddaw ken saanna a biniruk ti panagserbina kas presiding officer.
Nupay kasta, inyunay-unay na a saan a talikudan ti naipaay a responsibilidad kenkuana a tulungan ti senado ket ti impeachment court mainaig iti impeachment complaint kontra kenni Vice President Sara Duterte.
Sigun kenni Escudero, karbengan dagiti Minority senators ken dagiti abogado ni VP Sara nga idanun iti Korte Suprema ti pakaseknanda iti panagserbina kas presiding officer.
Daytoy ket tapno malawlawagan ken saanen a kasapulan a pagsusupiatanda no adda manen ti kapada nga insidente iti masakbayan.
Kabayatanna, inkari ni Escudero a mangisayangkat iti patas ken nalinteg a trial para kadagiti amin a partido.
Inyunay-unayna nga no anyaman ti pangngeddeng wenno konklusyon, sino man ti mapaburan ken masaktan; namnamaenna nga awatanen ken aksiptaren ti depensa ken presekusyon.
Innayonna nga ar-aramiden laeng ti Senado ti trabahona nga awan ti pabpaburanda.
