Agtaltalinaed a nangato ti presio dagiti construction supplies uray pay bimmaban ti presio dagiti produkto a petrolyo iti siudad ti Baguio.
Iti pannakiuman ti Bombo Radyo kenni Ralph Altiyen, Head Consumer Protection Division ti Department of Trade and Industry iti Baguio-Benguet, imbinglayna a ti makitkitana a rason ket gapo ta construction season ita a panawen ken nakadepende ti presio iti brand dagiti nasao a produkto.
Sigun kenkuana, regular met ti panangisayangkatda iti price monitoring kasta metten ti panangkitada iti mass variant dagiti produkto no umno ba dagiti length ken weight dagitoy nu sadino linnawas daytoy iti siudad ti Baguio bayat a mamingsan iti makabulan kadagiti munisipyo iti Benguet.
Nagballaag met ni Altiyen a mabalin mamulta dagiti agilaklako kadagiti substandard construction supply iti P17,500 bayat a dumanon iti agingga P1 million ti multa kadagiti agilaklako iti nangina a presyo a nalabes ngem iti naituding a price monitoring.
Ginuyugoyna met dagiti retailers ken consumers a no man adda dagiti construction supply a maatap a substandard wenno nangato unay ti presio ket i-report iti opisina ti DTI.//BomboKhey
