Bimmaba ti presio ti sumagmamano a highland vegetables iti La Trinidad Trading Post iti Km. 5, La Trinidad, Benguet.
Maibasar iti monitoring, karaman kadagiti bimmaba ti presio ket ti repolyo, patatas, ken sayote a kangrunaan a produkto iti rehion.
Agay-ayam iti ₱10-16 iti tunggal kilo ti Cabbage Wonderball, First-class Sayote ket agay-ayam iti ₱4 angingga iti ₱5 tunggal kilo; Second-class Sayote – ₱2-3 tunggal kilo; Potato Granola Jumbo – ₱60-65 tunggal kilo; Potato Granola Marble – ₱20-25 tunggal kilo; Potato LBR Jumbo – ₱60-65 tunggal kilo.
Sigun kenni Jean, maysa a disposer iti trading post, bimmaba ti presio dagiti nasao a nateng gapu iti adu a simmangpet a suplay.
Kabayatanna, ngimmato ti presio dagiti sumagmamano a nateng gapu iti limitado a suplay kas iti broccoli, celery ken cauliflower.
Ngimmato ti presio iti Broccoli iti ₱50-55 tunggal kilo; Trimmed Broccoli – ₱110-150 tunggal kilo; Cauliflower a ngimmato iti ₱50-70 tunggal kilo; Celery – ₱45-70 tunggal kilo bayat a nagtalinaed ti presio dagiti sumagmamano a nateng kas iti Lettuce Iceberg – ₱55-65 tunggal kilo; Green Ice Lettuce – ₱60-70 tunggal kilo; Radish – ₱18-30 tunggal kilo.
Iti interview ti Bombo Radyo kenni Jean, maysa a disposer iti trading post, impaganetgetna a saan laeng a tutukan ti Department of Agriculture (DA) ti presio no saan pay ket ti nangato a gastos dagiti mannalon kadagiti farm inputs kas iti abono, pestisidio, ken dadduma pay a pagmulaan.
Innayonna nga adu a mannalon ti mangkayat a makontrol ti presio dagiti apitda gaputa ammoda nga isuda a mismo ti kaaduan a maapektaran iti produksion.
Inlawlawag pay ni Jean a saan a maigarantiya ti presio dagiti nateng gaputa agpannuray daytoy iti supply ken demand iti merkado.
Iti laksid ti agbaliwbaliw a presio dagiti nateng, ti kinaawan ti natalged a suporta tapno masigurado ti patas a matgedan dagiti mannalon ken aglaklako ket maysa paylaeng a karit iti sektor ti agrikultura.
Ti saan a makontrol a gastos dagiti inputs iti talon ken ti agbaliwbaliw a presio ti merkado ket agtultuloy a mangpataud iti kinaawan ti sigurado iti industria.
`Gapu iti daytoy, maminsan manen nga aw-awagan dagiti mannalon ken aglaklako iti gobierno a saan laeng nga ipamaysa ti panangmonitor iti presio no di ket ti panangipamaysada pay iti pannakakessay ti gastos iti produksion.
Ti kaadda ti nasaysayaat a sistema iti sektor ti agrikultura ket saan laeng a makatulong kadagiti mannalon no di ket mangipasigurado pay iti ad-adu a makabael a presio dagiti nateng para kadagiti “consumers.”//Bombo Local News Correspondent Rizza
