Awan ti naobserbaran a panagbaliw iti presyo kadagiti kangrunaan a produkto iti Rehion Cordillera iti agdama.
Iti panakiuman ti Bombo Radyo kenni Jeremias Agpes, chief iti Consumer Protection Division iti Department of Trade and Industry-Cordillera,agtaltalinaed nga agay-ayam ti agdama a presyo dagiti basic necessities ken prime commodities iti Suggested Retail Price(SRP)dagitoy.
Sigun kenni Agpes, adda laeng dagiti daduma a nangipangato bassit iti presyo dagiti sumagmamano a lakoda nu sadino, dagitoy ket nainkalintegan paylaeng gapu ta maibasar iti impakitada a purchase document ket nangato metlaeng ti panaggatangda kadagitoy.
Kabayatanna, maur-uray paylaeng ti maipaiyulog a Suggested Retail Price(SRP) kadagiti Noche Buena items kagiddan ti umadanin a paskua.
Mainaig iti dayta, impetteng ni Agpes a naiparit ti pananginayon wenno panangibundle kadagiti produkto a dandanin a maperdi wenno asidigen ti expiration date na.
Gapu iti dayta, mapalpalagipan ti publiko wenno dagiti konsyumer a sukimatenda a naimbag dagiti gatgatangenda.
Kaspangarigan adda ti makitada a produkto a mailaklako paylaeng iti baet a nadanonen ti expiration date daytoy, masapol nga ireportda iti opisina iti Department of Trade and Idustry(DTI), Food and Drug Administration(FDA),ken iti Department of Health(DOH) tapno masukimat dagitoy.//Bombo Rob Dominguez
