BAGUIO CITY – Nababa unay ita ti presyo dagiti nateng iti La Trinidad Vegetable Trading Post nupay normal ti produksion wenno suplay daytoy.
Iti panakiyuman ti Bombo Radyo Baguio kenni Agot Balanoy, panakabagi ti liga dagiti asosasyon iti nasao a trading area, kinunana nga awan ti mabalinan dagiti mannalon no di ti mang-apit iti mula dagitoy iti baet dagiti parikut ti vegetable trading gapu iti epekto ti COVID-19.
Inlawlawagna nga idi kalman ket adda dagiti buyers a kontrolado ti ginatang dagitoy a nateng bayat nga adu met a buyers manipud Divisoria ti saan a gimmatang gapu iti kaawan ti paglakuan dagitoy iti deppaar ti Recto malaksid nga awan unay dagiti gumatang kadagiti residente sadiay.
Kinunana a gaputa alas-otso ti rabii ti curfew iti Recto ket saanen a makasangbot dagiti truckers nangruna no naipit dagitoy iti checkpoint ken no agilakoda iti kabigatanna ket nalungtoten dagiti nateng, partikular dagiti leafy vegetables.
Imbingayna pay a nakaawatda iti report manipud kadagiti buyers a saan a pinalubusan dagiti pulis sadiay NCR ti ilalabas dagiti bakante a trak manipud Bicol, Angeles ken dadduma a paset ti Pampanga a sumang-at kuma ditoy highlands tapnu agkarga ti nateng.
Dinakamatna nga indanunda metten ti nasao a pakaseknan iti dadaulo ti Cordillera Police para iti kaskenan nga addang tapnu maidanun met kadagiti maseknan a pulis ti NCR.
Nakikoordinar metten ti liga dagitoy kenni Mayor Romeo Salda ti La Trinidad para iti panakikoordinar met daytoy kenni Manila Mayor Isko Moreno tapnu maipalubos ti panaglako dagiti traders sadiay Recto iti aldaw wenno agsapa.
