BAGUIO CITY – Saan nga apektado ti presyo dagiti nateng a mailaklako iti La Trinidad Vegetable Trading Post gapu iti mapaspasaran ita nga epekto ti baro a tax reform law.
Iti panakiyuman ti Bombo Radyo kenni Agot Balanoy, panakangiwat ti liga dagiti asosasyon iti Trading Post, kinunana a mabaliwan laeng ti presyo dagiti nateng a magatang sadiay no dagitoy ket maibiahe paturong iti dadduma a probinsia kas iti Divisioria sadiay Metro Manila.
Kinunana a ti presyo dagiti nateng a mailaklako sadiay Trading Post ket nakabase wenno agpannuray iti demand ken supply.
Dinakamatna nga uray nangina ti krudo no adu ti suplay ti nateng a naisangpet iti Trading Post ket nababa latta ti presyo dagiti nateng.
Inlawlawagna a maapektaran laeng ti presyo dagitoy no agpatong dagiti buyers no ibiahedan pasalog dagiti nateng gapu iti transporation expenses.
Innayon ni Balanoy nga ita a ngimmina ti krudo ket P15-P16 ti inaynayon dagiti buyers iti presyo ti tunggal kilo ti nateng manipud iti Trading Post nga ilakoda met sadiay Metro Manila manipud iti sigud a P10 tunggal kilo.
