Sentimo paylaeng ti naobserbaran a ngimmatwan ti presyo dagiti school supplies iti Baguio City ken pobinsya ti Benguet iti agdama.
Iti panakiuman ti Bombo Radyo kenni Ralph Altiyen, dadaulo ti Consumer Protection Division iti Department of Trade and Industry Baguio – Benguet, awan pay ti significant increase wenno significant changes iti presyo dagiti school supplies ti agdama nu idilig iti sigud a presyo daytoy idi napan a tawen.
Maibasar iti inisyal a panagmonitor dagitoy, kadawyan a convenience pricing ti ar-aramiden dagiti aglaklako kas iti sarado trenta a piso iti 29.75 a balor ti maysa nga item.
Sigun kenni Altiyen, maur-uray paylaeng ti maipaulog a suggested retail price (SRP) rason a maipalpalagip kadagiti retailers a surotenda pay ti sigud a naipaulog idi napan a tawen.
Mainaig iti dayta, impettengna a saan nga epektibo ti polisiya a “No Return, No Exchange” kadagiti establishimento gapu ta addaan ti karbengan dagiti konsyumer nga isubli, isukat, wenno irefund dagiti nagatang dagitoy a defective items.
Kagiddan dayta, mapalpalagipan dagiti konsyumer a sakbayda a pumanaw iti naggatanganda nga establishimento ket sukimatenda a nalaing dagiti gatangenda a gamit.
Kinuna pay ni Altiyen a mabalin a mangipila dagiti konsyumer ti pormal a reklamo iti opisina ti Department of Trade and Industry nu saan a bigbigen ti naggatanganda nga establishimento ti depektibo a gamit.
Kabayatanna, maisingsingasing kadagiti konsyumer a dagiti nakairuamanda a brand ti school supplies ti gatangeda para iti safety purposes gapu ta adda dagiti brands a posible a saan a pimmasa iti requirement ti Food and Drug Administration.//Bombo Rob Dominguez
