BAGUIO CITY – Maob-obserbaran latta ti panagkurang ti suplay ti karne ti baboy iti Cordillera kagiddan ti agtultuloy a panakailista dagiti baboy a makapkaptan ti African Swine Fever (ASF) iti nagduduma a paset ti rehion.
Sigun kenni Dr. Kevin Jim Luna, Regional ASF Focal Person ti Department of Agriculture- Cordillera, nangina latta ti karne ti baboy gapu iti kinakurang ti suplay daytoy kalpasan nga adu a baboy iti rehion ti naapektaran iti ASF.
Kinunana nga aminen a probinsya iti rehiyon ket addaan ti nailista a kaso iti ASF nupay ti Apayao ti kangrunaan a naapektaran iti nasao a sakit dagiti baboy.
Maibasar iti rekord dagitoy, 106 a barangay kadagiti 39 a munisipyo iti entero a Cordillera ti nakailistaan ti ASF.
Dinakamatna a gapu iti daytoy agtultuloy a panakailista ti kaso ti nasao a sakit dagiti baboy iti rehion ket agtultuloy met latta dagiti programa ti DA tapnu mapunasen ti ASF iti rehion.
Imbinglayna nga agtultuloy ti panangipaayda ti amin nga impormasyon mainaig iti ASF, ti panangiwanawanda kadagiti agtartaraken ti baboy iti rehion ken ti narugianen a swine stocking program kadagiti lugar nga awanan ti kaso ti ASF tapnu umado ti suplay ti karne ti baboy iti rehion.
Innayon ni Dr. Luna a naingetan metten dagiti animal quarantine checkpoints pastrek iti rehion tapnu maipanamnama nga awan dagiti baboy a positibo iti ASF a maiyuneg iti Cordillera.
Pagyamyamananna pay ti kooperasyon dagiti agtartaraken ti baboy iti Cordilleras iti kampanya tapnu maparmeken ti presensia ti ASF iti rehion.
Iti agdama, magatang ti tunggal kilo ti karne ti baboy iti P350 agingga P380.
