BAGUIO CITY -Agtaltalinaed nga stable ti presyo ti tinapay ken sardinas iti Cordillera kas maibasar iti panagwanawan ti Department of Trade and Industry (DTI).
Iti panakiuman ti Bombo Radyo Baguio, kinuna ni Jerry Agpes, Division Chief of the Consumer, linawas nga iwanwanawanda dagiti establishemento iti Baguio City bayat a binulan met kadagiti nagduduma a municipyo.
Dinakamatna a kaadoan kadagiti establishemento iti rehion ket agtultulnog iti suggested retail price (SRP) nga intuding ti DTI.
Nupay kasta, inaklonna nga adda ti uppat a pulo ket lima nga establishemento nga impaayanda ti Letter of Inquiry tapno agpalawag nu apay a nangatngato ti presyo ti lakoda nu idilig iti SRP nga intuding ti ahensia.
Manipud iti nasao a bilang dagiti establishemento, dua pulo ditoy ket masarakan iti Baguio-Benguet nu sadino nagpalawagen dagitoy.
Karaman kadagiti inginada a produkto ti canned goods ken kape.
Impetteng ni Agpes a kaadoan a rason dagiti business owner ket nangato ti presyo dagiti produkto idi ginatangda kadagiti distributor rason nga innginada met ti presyo.
