Saan a mapatgan dagiti pribado a drones bayat ti parada iti Panagbenga Grand Street Dancing Parade ken Grand Floral Float Parade inton Pebrero 28 agingga Marso 1.
Sigun kenni Evangeline Payno, chief of staff of the Executive Committee of the Baguio Flower Festival Foundation, Inc., ti nasao a foundation, Baguio City Police, ken ti Philippine Military Academy laeng iti mapatgan nga agaramat kadagiti drones bayat ti nasao a programa.
Immunan a kinuna ni Executive Committee chairman Anthony De Leon a dagiti laeng naipaayan ti permit manipod iti Civil Aviation Authority of the Philippines (CAAP) ti mapatgan.
Kinunana a ti panagaramat kadagiti drones para iti nasao a programa ket kasapulan nga umuna nga aprobaran ti city police.
Daytoy ket tapno maipasigurado ti kinatalged ti publiko babaen iti panangipasigurado a dagiti drones ket nasayaat ti kondisionda ken kasapulan a dagiti lisensiado nga indibidual laeng ti agoperate.
Kabayatanna, sigun met kenni Police Major Marcy Grace Marron, Baguio City Police information officer, ti drone dagitoy ket maikonektar iti Baguio City Command Center kas kanayunan a security feature para iti programa.
Agarup 1,529 police personnel a naka-uniporme ken nakakawes laeng iti plain ti mangipasigurado iti piesta.
Nasurok dua gasut a force multipliers manipod iti city government, public order and safety division, emergency medical service, city disaster risk reduction and management office, ken health services office ti maideploy iti programa.
Mainayon pay ti agarup 606 criminology student-interns nga agserbi a mangipasigurado iti talna ken kappia bayat ti dua a parada.
