![](https://img.bomboradyo.com/baguio/2019/04/POLICE-REPORT-1.jpg)
BAGUIO CITY – Sumangsango ti maysa a pintor iti kaso a frustrated homicide kalpasan a binagbagsolna ti employerna sadiay Suelo Village, Bakakeng Central, Baguio City idi kanikadua.
Nabigbig ti suspek a ni Erwin Besa Buena Cruz, 19-anyos ken residente ti Dagupan City, Pangasinan bayat a nabigbig ti biktima a ni Anthony Ramirez, 39-anyos, private contractor ken residente ti Bakakeng Sur, Baguio City.
Maibasar iti report, imbilin ti biktima ti panangliha manen ti suspek iti dingding a pininturaan daytoy ken mapapati a naisawang ti biktima a bin-ig a backjob ti aramid ti suspek ken sayang dagiti materyales.
Kalpasanna, napan ti biktima iti silidna tapnu maturog ngem kabayatan ti pannaturog ti biktima ket killaat a pimmatong kenkuana ti suspek.
Binagbagsol ti suspek ti biktima iti namin adu a daras ken kabayatan ti insidente ket nakita daytoy ti maysa kadagiti katrabahuan ti suspek isut gapuna nga inanawana ti suspek ken tinulonganna ti biktima.
Naitaray ti biktima iti pagagasan ken iti panagresponde ti pulisya ket intudo ti testigo ti suspek a nagresulta iti panakakemmeg daytoy iti ayan ti pagtatrabahuanjda.
Mapapati a naaramid ti suspek ti nasao a krimen kalpasan a napasaktan daytoy iti naisawang ti biktima.