BAGUIO CITY – Saanen a maipatungpal ti price ceiling kadagiti karne ti baboy iti Baguio City.
Sigun kenni City Veterinarian Dr. Brigitte Piok, napagnunumuan dagiti maseknan nga ahensiya pakairamanan ti Department of Agriculture (DA)-Cordillera ken ti lokal a gobyerno ti Baguio a saanen a maipatungpal ti price ceiling gapu iti agdama a sitwasyon ti siudad.
Inlawlawagna a nakadependar ti price ceiling iti suplay ken demand dagiti baboy ken dagiti gastos ti supplier, traders ken retailers nga agturong iti siudad.
Kinunana a posible nga awan ti agilako iti karne ti baboy iti merkado publiko iti kanito a maipatungpal ti price ceiling nangruna no nababa unay daytoy gapu ta malugi laeng dagiti retailers.
Inyunay-unayna met a bimmaba ti presyo dagiti karne ti baboy gapu iti panagkapoy ti demand daytoy iti merkado publiko.
Imbinglay pay ni Dr. Piok a panggep ti DA a mangisayangkat ti re-population program ditoy rehion a naponduan ti P15-M tapno matulungan dagiti agtartaraken ti baboy a makarekober manipud iti panakalugida gapu iti ASF outbreak ken masustinir ti suplay ti baboy iti rehion.
Mainaig iti daytoy, pagam-amkan met dagiti meat vendors nga awanen ti gumatang kadagiti karne ti baboy iti kanito a ngummato manen ti presyo dagitoy.
Iti agdama, dumanon iti P340 agingga P360 ti presyo ti tunggal kilo ti karne ti baboy ken posible a bumaba pay daytoy iti sumarsaruno a lawas.
