Awan pay ti nairekord iti Department of Trade and Industry-Baguio-Benguet nga establishimento a naglabsing iti naipaiyulog a price guide kadagiti school supplies.
Iti panakiuman iti Bombo Radyo kenni Ralph Altiyen,dadaulo iti Consumer Protection Division iti Department of Trade and Industry-Baguio-Benguet, apaman a nangipaiyulog ti head office iti price guide idi napan a lawas,dagusda nga inwaras daytoy kadagiti maseknan nga establishimento tapno makapagtulnog dagiti agtagilako.
Sigun kenni Altiyen, naobserbaranda met nga ar-aramiden dagiti agtagilako ti kabaelanda tapno suruten ti naipaiyulog a price guide.
Adda met dagiti daduma a reatailer a nakagatang kadagiti ilakoda iti nanginngina bassit a presyo rason a kasapulanda nga i-adjust dagiti presyo ti lakoda maitunos iti naipaiyulog a price guide.
Maibasar iti naibinglay a rekord, dumanon iti 173 nga item ti namonitor ken naipaayan iti price guide idi napan a tawen.
Manipod iti nasao a bilang, 100 kadagitoy ti saan a nagbaliw ti presyona ita a tawen, 29 dagiti bimmaba, bayat a 17 met dagiti ngimmato.
Mainaig iti dayta, kaadwan kadagiti school supplies a mailaklako ket naaramid iti pagilian bayat nga adda latta dagiti nagtaud iti ballasiw-taaw.
Innayon ti opisyal a kinuna dagiti retailer nga iti agdama ket awan pay ti naobserbaran a panagkurang iti suplay.//Bombo Rob Dominguez
