Nagpalagip manin ti Police Regional Office-Cordillera iti publiko, nangruna kadagiti agbyahe wenno pumanaw kadagiti pagtaenganda para iti Undas inton sumaruno a bulan.
Sigun kenni Police Lieutenant Colonel Genevieve Revocal iti PRO-CAR, napateg nga adda ti mabati wenno agbantay kadagiti pagtaengan no rumwar inton Undas.
Impeksana a masapul a siguradoen dagiti residente a naka-lock amin dagiti ridaw ken tawa dagiti babbalayda tapno masalakniban dagiti bambanag a mabati iti uneg ti pagtaengan ken tapno awan ti makaserrek nga agtatakaw.
Nagpalagip met ti pulisya a nasayaat no ipakaammo dagiti residente kadagiti mapagtalkan a kaarruba wenno kakabagianda no agturong dagitoy iti sabali a lugar.
Kasta met a nagpalagipda a siguradoen dagiti silaw ken saksakan a naka off amin ken kasta met dagiti gasul tapno maliklikan iti uram bayat nga awan dagitoy iti pagtaenganda. //Bombo Khey Riparip
