Agsagsaganan ti probinsya ti Benguet para iti panaghost daytoy iti mapadpadaanan a Cordillera Administrative Region Athletic Association (CARAA) Meet 2025 a naituding a maangay inton February 22-28, 2025.
Iti panakiuman ti Bombo Radyo kenni Ceasar Luma-ang, Provincial Sports Officer iti Department of Education (DepEd)-Cordillera, kinunana a 90% a nakasaganan dagitoy nu sadino, maipinal laengin dagiti daduma a playing venues kasta met a makikokoordinarda iti siudad ti Baguio para iti panakaipatungpalan dagiti sumagmamano nga ay-ayam.
Sigun kenni Luma-ang, nakasaganan ti Wangal Track Oval para iti Track and Field events.
Malaksid iti dayta, maipanamnama met ti panakapapartak iti panakatarimaan ti Benguet Aquatic Center a posible a malpas iti ngudo ti agdama a bulan wenno iti umuna a lawas ti Pebrero.
Kinuna ti Provincial Sports Officer a namnamaenda ti isasangbay dagiti delegado manipod nagduduma a probinsya iti rehiyon Cordillera inton February 21 wenno 22 ken naituding a maipatungpal ti solidarity meeting inton February 23, bayat a mangrugi ti aktual a kompetisyon inton February 24.
Kagiddan ti panagrugi ti nasao nga sports event ti panakaangay met iti Grand Floral Float Parade a maysa kadagiti Highlights iti Baguio Flower Festival a sigun iti opisyal ket mabalin latta adar-ayan dagiti atleta gapu ta agsinnabali met ti oras iti panakaangay dagitoy.
Malaksid iti dayta, nakasagana metten dagiti pagadalan idiay La Trinidad a temporaryo a pagdagusan dagiti delegado para iti makalawas nga ay-ayamda.
Impasigurado metlaeng ni Luma-ang a nakasaganan dagiti medical team kadagiti nagduduma a pakaangayan iti ay-ayam para iti dagus a panakaipaay iti first-aid nu sadino,makitinnulong metlaeng dagiti amin nga health personnel dagiti amin a munisipyo, dagiti kameng iti Benguet General Hospital ken dagiti bukod a medical team dagiti tunggal delegasyon.
Kabayatanna, maur-uray paylaeng met ti idonar ni Benguet Congressman Eric Go Yap.//Bombo Mera Pacpacan
