Imparangen dagiti sangapulo ket tallo a munisipalidad ti Benguet dagiti nagduduma a lokal a produkto babaen iti Agri-Tourism Fair kas paset iti selebrasion ti Adivay Festival 2026, a maisaysayangkat sadiay Benguet Cold-Chain Compound iti Wangal, La Trinidad.
Babaen iti nasao a fair, naiparang dagiti nagduduma a produkto ti agrikultura a naggapu iti tunggal munisipyo ti probinsia, agraman dagiti natnateng, mula, naproseso a produkto manipud iti talon, lokal a makan, ken tradisional a delicacies a mangipakita iti pannakabigbig iti umili ti Benguet.
Maiparang met dagiti nagduduma a handicrafts ken dadduma pay a lokal a produkto a mangipakita iti kultura, tradision ken kinapateg ti umili iti tunggal munisipalidad.
Saan laeng a pangiparang dagiti produkto ti panggep daytoy nu di ket agserbi metlaeng daytoy a gundaway para kadagiti mannalon, lokal a negosyante ken artisan tapno maidisplay dagiti produkto da kadagiti bisita ken turista, kasta metten a tapno lumawa ti merkado dagitoy.
Pormal a nailukat ti nasao a perya idi November 12 iti panangidaulo ni ni Benguet Governor Melchor Diclas iti ribbon-cutting ceremony a sinaruno ti blessing ceremony. Naorganisa daytoy babaen iti Committee on Adivay Agri-Tourism Fair iti babaen ti Office of the Provincial Agriculturist nga indauloan ni Delinia Juan.
Paset iti pangipakita iti fair dagiti traditional-inspired a balay wenno pagtaengan a mangirepresentar iti tunggal munisipalidad ken mangipakita iti bukod a kultura, produkto, ken dagiti naisangsangayan a pagtaudan ti pagbiagan dagiti umili.
Dagiti 13 a munisipalidad a mangibagi iti probinsia ket Atok, Bakun, Bokod, Buguias, Itogon, Kabayan, Kapangan, Kibungan, La Trinidad, Mankayan, Sablan, Tuba ken Tublay.
Malaksid kadagiti fresh products, naiparang metlaeng dagiti ornamental plants, woven textiles, ken handicrafts, a mangipakita iti abilidad dagiti lokal a mannalon ken mangpartuat iti Benguet.
Saan laeng a pangipakita kadagiti produkto ti panggep ti Agri-Tourism Fair, nu di ket maysa met a wagas tapno mapapigsa ti lokal nga ekonomia babaen iti panangipaay iti gundaway kadagiti mannalon, negosyante ken artisan a mangipakaammo ken mangilako kadagiti produkto da.
Kabayatanna, agtultuloy ti fair agingga inton November 26.
Maipalagip nga ti Adivay Festival ita a tawen ket mangselebrar iti maika-126 a founding anniversary ti Benguet nga addaan iti tema a “Binnadang: We Unite, Build, and Serve for a Healthier Tomorrow,” kas panangipaganetget iti kinapateg ti panagkaykaysa ken panagtitinnulong dagiti umili para iti nasaysayaat a masakbayan ti probinsia. //via Bombo Khey Reparip











