BAGUIO CITY – Agtultuloy dagiti programa ken interventions ti Benguet Provincial Health Office kontra iti panagwaras ti Dengue iti probinsia.
Kasaruno daytoy ti nasurok 300% a ngimmatoan ti kaso ti dengue a nailista ti Benguet iti umuna nga kwarter ti agdama a tawen.
Iti interview ti Bombo Radyo Baguio ken Dr. PHO Medical Specialist Dr. Andrew Bacuso, kinunana nga 373 ti kaso ti dengue a nailistada manipod Enero agingga iti agdama.
Kinunana nga adayu a nangato daytoy nu idilig iti 129 a nailista idi napan a tawen.
Nupay kasta, imbinglayna nga agtaltalinaed a 1 ti bilang ti pimmusay gapu iti dengue babaen ti maysa nga senior citizen manipod Brgy. Cruz, La Trinidad.
Sigun kenkuana kangrunaan a tuttutukanda dagiti lugar a pakailislistaan ti adu a kaso kas iti La Trinidad nu sadinno naobserbaran nga adu latta dagiti mabalin nga pag-itlogan wenno pagbalayan dagiti lamok.
Iti baet dayta, inayon met ni Health Education & Information Officer -Patrick Depolio, a bumabbaban ti kaso ti dengue a mailislista ti probinsia iti naglabas a duwa a lawas.
Babaen daytoy dagiti addang ken programa ti Benguet PHO kontra iti dengue pakairamanan ti Aksyon sa Brgy. Kontra Dengue nu sadinno makita ti koordinasyon dagiti babbarangay a mangipakaammo iti panakasalwad kontra dengue.
Malaksid iti dayta, idiadiayada pay ti nasapa a panag-pakonsulta dagiti umili nu makariknadan kadagiti sintomas ti dengue tapnu dagus a makontrol ken maipaayan iti kaskenan nga medikasyon./CLAIRE
