--Ads--

Pinabileg pay ti City Social Welfare and Development Office (CSWDO) ken Baguio City Police Office (BCPO) dagiti programa ken panagserbi a mangsalaknib kadagiti ubbing, nangruna kadagiti menor de edad a nairaman iti krimen ken dagiti agbalin a biktima ti aniaman a porma ti panagabuso.

Maysa kadagiti kangrunaan a panggep dagitoy a programa ket ti panangpasigurado a maipaay kadagiti ubbing ti umiso a proteksion, panangbantay ken suporta, saan laeng a bayat ti problema no di ket uray iti proseso ti panagimbag ken panagsubli iti komunidad.

Sigun iti CSWDO, nakailista ti opisina iti 167 a kaso ti Children in Conflict with the Law (CICL) manipud Enero agingga Disiembre 2025, bayat a 142 a kaso ti nairekord manipud Enero agingga Setiembre 2026.

Kas sungbat kadagitoy a kaso, ipatpatungpal ti CSWDO dagiti center-based ken community-based intervention programs a mangipaay iti panangisuro kadagiti menor de edad tapno maawatan dagiti biddut a naaramid ken maipasdek ti nasayaat a kababalin.

Babaen kadagitoy a programa, maipaay kadakuada dagiti basic life skills, self-awareness, anger management ken stress management sessions a mangtulong iti panangkontrol iti emosyon, panangrisut kadagiti parikut ken panangaramid kadagiti nasayaat a desision.

No makita a kasapulan ti ad-adu pay a suporta, mangipaay met ti opisina iti referral para iti psychological intervention tapno mataming dagiti emosional ken psychological a kasapulan dagiti ubbing.

Saan laeng a dagiti menor de edad ti mairaman iti intervention, no di ket uray dagiti nagannakda babaen iti Parent Effectiveness Service, a mangipaay iti pannakabigbig kadagiti umiso a wagas ti panangdisiplina, panangaywan ken panangtaripato kadagiti annak.

Kabayatanna, nakailista met ti CSWDO iti 103 a biktima ti child abuse manipud Enero agingga Setiembre 2026, agraman dagiti kaso ti physical, sexual ken emotional abuse. Dagiti biktima ket manipud iti edad a zero agingga 17 years old.

Gapu iti daytoy, itultuloy ti opisina ti panangibinglay kadagiti information and education campaigns kadagiti pagadalan ken barangay tapno mapadakkel ti pannakaammo ti publiko kadagiti karbengan dagiti ubbing ken dagiti wagas a manglapped iti panagabuso ken bullying.

Panggep metlaeng ti kampanya nga ippakaammo kadagiti nagannak, mannursuro ken miembro ti komunidad maipapan iti napateg a pasetda iti panangsalaknib kadagiti ubbing, nangruna iti panangbigbig kadagiti pagilasinan ti panagabuso ken panangipakaammo iti dagus kadagiti maseknan nga ahensya.

Saan met a malipatan ti panangisagana kadagiti ubbing iti panangsango kadagiti emerhensia babaen kadagiti basic life support ken disaster preparedness trainings tapno ammoda dagiti umiso nga aramiden no adda ti didigra wenno sabali a peligro.

Sigun met iti Baguio City Police Office, adda ti 24 a kaso ti Children in Conflict with the Law a nairekord daytoy idi Enero agingga Nobiembre 2026, nababbaba no idilig iti 31 a kaso idi 2025.

Kangrunaan kadagiti kaso a nairekord ket dagiti physical injuries ken dagiti panaglabsing a saklawen ti Anti-Rape Law.

Babaen kadagiti Women and Children Protection Desk (WCPD) iti tunggal police station, maipaay ti dagus a tulong kadagiti agkasapulan, agraman ti pannakikoordinar kadagiti social welfare agencies tapno masigurado a maipaay kadagiti biktima ti kasapulan a suporta ken proteksion.

Sigun iti BCPO, nakasagana dagitoy a mangsungbat kadagiti reklamo ken insidente a mangiraman kadagiti babbai ken ubbing. Makikoordinar metlaeng dagitoy iti DSWD ken CSWDO, nangruna no menor de edad ti mairaman iti kaso, tapno maiturong dagitoy kadagiti umiso a intervention services.

Dagiti menor de edad a mairaman iti krimen ket saan laeng a maibilang a parte ti imbestigasion, no di ket masapul a maipaayan iti umiso a panangtaripato a maitunos iti karbenganda ken dagiti pagannurotan ti linteg.

Kabayatanna, nagpalagip ti BCPO kadagiti nagannak a nasaysayaat ti panangbantayda kadagiti annakda, agraman ti panangammo kadagiti ar-aramidenda, gagayyemda ken dagiti lugar a papananda tapno maliklikan dagiti posible a peligro.

Nagpalagip met dagiti otoridad a saan a rumbeng a baybay-an dagiti insidente ti panagabuso, panangbutbuteng wenno panangdangran kadagiti ubbing, uray no mapaspasamak daytoy iti uneg ti pagtaengan wenno iti publiko.

Ginuyugoy ti BCPO ti publiko a dagus nga ireport kadagiti Women and Children Protection Desk ti aniaman a kaso ti panagabuso wenno agtawag iti 911 no kasapulan ti dagus nga aksion ti pulisya.

Impalagip dagiti ahensya a saan laeng a responsabilidad ti gobyerno ti panangsalaknib kadagiti ubbing, no di ket paset met daytoy ti tunggal nagannak ken miembro ti komunidad tapno masigurado a dagiti ubbing ket dumakkel iti naayat a pagtaengan, natalged ken nasayaat iti komunidad.// Bombo Khey Reparip