BAGUIO CITY – Inlawlawag ti Department of Labor & Employment (DOLE) ti programa a maipatpatungpal para kadagiti mangmangged iti informal sector wenno dagiti awanan iti employee-employer relationship kas kadagiti vendors, drivers ken dadduma pay.
Sigun ken ni DOLE-Cordillera Regional Director Exequiel Ronie Guzman, napauluan ti nasao a programa iti Tulong Panghanapbuhay sa Ating Disadvantaged/Displaced Workers (TUPAD) no sadino, mangipapaay ti ahensia iti short term employment assistance kadagiti apektado nga empleado.
Kinunana nga iti sidong ti programa ket maipaayan iti trabaho dagiti empleado a napukawan iti panggedan ken mabalinda nga agtrabaho iti sangapulo nga aldaw ken makaawatda iti inaldaw a sueldo a katukad ti kangatuan a minimum wage ditoy rehion.
Binalakadan ni Guzman dagiti apektado nga empleado iti informal sector a makikoordinar laeng dagitoy iti kapitan ti barangay para iti panagaplikarda iti programa a TUPAD.
