Dumanunen iti 45% ti naimplimintar ti lokal a gobyerno ti Baguio City a proyekto a nairaman iti Php2.5 billion a budget daytoy para iti agdama a tawen.
Iti panakiuman ti Bombo Radyo kenni Atty. Leticia Clemente, Budget Officer ti Baguio City, panggep dagitoy a papartaken ti panakaimplimintar dagiti proyekto a naituding a malpas ita a tawen gapu ta masapol manen a maisagana ti panakaaramid ti budget para inton 2025.
Inlawlawag ni Atty.Clemente a saan unay a dakkel ti ngimmatwan ti pondo ti Baguio City ita tawen gapu ta awan ti naipatungpal a panakaipangato ti business taxes iti siudad a maysa kadagiti resources dagitoy.
Mainaig iti dayta, dinakamat ti opisyal a bassit laeng ti bingay ti siudad iti ipapaay ti gobyerno manipod iti National Tax Allocation gapu ta saan unay a nalawa ti land area a masakupan daytoy a maysa kadagiti maar-aramat a basaran ti panakipaay ti nasao a pondo.
Ti pondo a mapapataud ti lokal a gobyerno ket dandani katukad metlaeng ti maaw-awat daytoy manipod iti National Tax Allocation rason a masingsingasing ti panagbalin dagitoy nga entrepreneurial tapno dakdakkel ti mapataud a pondo manipod kadagiti local sources.
Sigun pay kenni Atty. Clemente, adu dagiti mapanpanunot dagitoy nga estratehiya ngem kasapulan pay a dumalan dagitoy iti konsultasyon.
Kabayatanna, maguyguyugoy met dagiti dadaulo ken opisyales dagiti nagduduma a barangay iti Baguio City nga irebyuda wenno adalenda a nalaing dagiti proyekto wenno programa a panggepda nga ipatungpal kadagiti masakupanda tapno maammoan ti city government ti masapol a maipangruna.//Bombo Rob Dominguez
