BAGUIO CITY – Manarimaanen ti public consultation para iti napabaruan wenno narebisa a La Trinidad Vegetable Trading Post Code sadiay La Trinidad, Benguet.
Iti panakiyuman ti Bombo Radyo Baguio kenni Agot Balanoy, manager ti maysa a farmers multi-purpose cooperative iti Benguet ken public relations officer ti liga dagiti asosasyon iti La Trinidad Vegetable Trading Post, kinunana nga isaysaysangkat ti Sangguniang Bayan ti nasao a konsultasyon iti panangidaulo ni Vice Mayor Roderick Awingan.
Sigun kenkuana, nailanad iti narebisa a La Trinidad Vegetable Trading Post Code dagiti baro a pagalagadan a nasken a suruten dagiti amin a mannalon, buyers, repackers ken dadduma nga stakeholder sadiay.
Kinunana a napintas dagiti probisyon ti narebisa a Code gaputa pagsayaatan ken pagnumaran daytoy dagiti stakeholders iti vegetable industry iti lokalidad.
Innayonna a makatulong daytoy iti panakarisot dagiti parikot iti uneg ti nasao a trading area.
Imbinglayna a maysa kadagiti probisyon iti narebisa a Code ket ti maikalkalikagum nga akreditasyon dagiti amin a vegetable buyers tapnu maipasigurado a lehitimo dagiti gumatgatang kadagiti produkto dagiti mannalon.
Inyunay-unay pay ni Balanoy a saan a bias dagiti inaramida a probisyon ti Code gaputa maala met ti benneg dagiti mannalon babaen iti agdama a konsultasyon.
Posible met a mairugi ti implementasyon ti narebisa a Code inton bulan ti Disyembre.
