--Ads--
BAGUIO CITY – Al-allukoyen ti Department of Education Baguio City Division ti publiko a makipaset dagitoy iti Fun Run nga ipatungpalda inton Marso 11 a mangrugi iti alas kuwatro ti parbangon.
Inlawlawag ni Julian Alcabedos Jr., fun run organizer, a ti maur-or a pondo iti nasao nga aktibidad ket maaramat iti panakagatang ti nagduduma a kagawaan iti walo a parapubliko a pagadalan ditoy siudad.
Kinunana a karaman kadagiti gatangenda dagiti ICT equipment kas iti projectors, printers ken desktop computers.
Innayunna a kasapulanda dagiti nasao a kagawaan para kadagiti 21st century learners.
Para kadagiti kayatda ti agrehistro ket mabalinda ti agturong iti opisina dagitoy wenno kontakenda ti numero a 0929-847-3980.
