Impasigurado ni Dr. Celia Flor Brillantes iti publiko nga awan ti rumbeng a pagdanagan dagitoy iti nailista a dua a kaso ti monkey pox iti siudad ti Baguio.
Iti pannakiuman ti Bombo Radyo kenkuana,kinunana a nakamonitor dagitoy ken nakarekoberen ti umuna a kaso ken nalpasen ti isolation daytoy rason nga awan ti rumbeng a pagdanagan.
Malaksid iti dayta, nakaisolate metten ti maikadua a kaso no sadino naituding nga agleppas ti isolation daytoy inton Pebrero a tres kalpasan a naakaranda iti nasao a sakit gapu iti close physical contact iti partner-da.
Impetteng pay ni Dr. Brillantes nga imonmonitor dagitoyen dagiti nakapulapol dagitoy tapno maliklikan ti panagraira ti nasao a sakit.
Impasiguradona metlaeng a nakasagana ti siudad ti Baguio agsipud ta addan dagiti nakasagana a maaramat para iti isolation kasta metten nga agtataripnong dagitoy kaduada dagiti hotel and inns associations iti siudad tapno mapakaammuanda iti nasken nga aramiden dagitoy.
Imbinsabinsana met dagiti sintomas daytoy kas iti panaggurigor iti tallo agingga lima nga aldaw, panagsakit ti bagbagi, red spots iti kudil ken dadduma pay.
Kabayatanna, namnamaenna metlaeng a saanen a manayonan ti nasao a kaso ti sakit babaen iti panagannad ti publiko.
Gapu iti dayta, inyunay-unayna kadagiti turista ken kadagiti umili iti siudad a makipaset iti mapadpadaanan a Panagbenga Festival nga no makapasar dagitoy iti panaggurigor ket agtalinaedda latta iti uneg ti babbalayda ken paliiwen dagitoy a nasayaat ti salun-atda.
