Maal-allukoy ti publiko nga agbuya iti lantern parade ken Christmas tree lighting iti siudad ti Baguio inton dominggo, disyembre a uno.
Mangrugi ti parada iti Session Rotonda agingga iti Melvin Jones Grand Stand iti oras ti alas sais iti malem.
Kagiddan dayta, nagpalagip manen iti publiko ni Police Lieutenant Colonel Zacharias Dausen ti Chief ti traffic enforcement unit- Baguio tapno sapsapaen nga agturong iti siudad tapno maliklikan ti nailet a gunay ti trapiko.
Iti interview ti Bombo Radyo kenkuana, manamnama nga adu dagiti agbuya rason a kasapulan a sapsapaen nangruna dagiti addaan iti lugan tapno adda ti pagparadaan dagitoy.
Nagpalagip pay daytoy a no kaspangarigan maladaw ket mabalin nga aglugan kadagiti parapubliko a lugan tapno saan nga agparikut iti pagparadaan.
Kinunana metlaeng a nakikoordinar dagitoyen kadagiti drivers ken operators dagiti parapubliko a lugan tapno agbyahe amin dagitoy tapno adda ti pagluganan dagiti agbuya nangruna iti rabii.
Innayon pay ti nasao nga opisyal nga adda dagiti idiay-diaya dagitoy a libreng sakay kadagiti awan ti paglugananna a nagbuya iti nasao a parada.
