Nagballaag dagiti otoridad iti publiko kontra iti panagngato dagiti nailislista a kaso ti online scams nangruna iti romance scams kasaruno ti umadanin a Valentine’s Day.
Gapu iti dayta, agtitinnulong dagiti otoridad manipud iti Australian Federal Police and Australia’s National Anti-Scam Center, Presidential Anti-Organized Crime Commission (PAOCC) ken ti National Bureau of Investigation (NBI) tapno mabigbig dagiti fraudulent scheme nga i-op-operate dagiti cybercriminals iti Pilipinas.
Daytoy ket tapno matiliw metlaeng dagiti suspek iti nasao a romance scams no sadino kaadduan kadagiti Australians ti mabikbiktima.
Ti pannakadiskubre dagitoy a kaso ket paset ti Operation Firestorm tapno maliklikan ti panagraira ti scam.
Sigun kenni NBI Director Jaime Santiago, dagiti suspek ket agar-aramat iti artificial intelligence wenno AI tapno mang-allilaw kadagiti biktima iti online romance scams.
Gapu iti dayta, maidagdagadag iti publiko nga agbalin a naridam kontra kadagiti scammers.
