Pimmusay ti maysa a pulis ken holdaper bayat a nadangran ti dua a sibilyan kalpasan a nagresulta iti engkwentro ti panagresponde iti insidente ti panaghold-up idiay Brgy Commonwealth, Quezon City itay parbangon, Hunyo 30.
Nabigbig ti pimmusay a pulis a ni Patrolman Curtney Harwin Baggay, tubo ti Pinukpuk, Kalinga.
Saan pailaeng a nabigbig ti pimmusay a holdaper a mapatta-patta nga agtawen iti 25-35, addaan katayag a 5’4″, nakasuot iti black t-shirt nga addaan iti Skeptron marking, black a jogging pants ken tsinelas.
Nadangran met dagiti dua a sibilyan a da alyas “Sonny” ken alyas “Irah” kalpasan a natamaan dagitoy iti ligaw na bala.
Maibasar iti report ti Criminal Investigation and Detection Unit ti Quezon City Police District (CIDU-QCPD), agarup 2:30 itay parbangon, Hunyo 30 idi napasamak ti engkwentro idiay Brgy. Commonwealth, Quezon City.
Iti inisyal nga imbestigasyon da PSSg Randy Narciso ken PSSg Charlie Julaton, agbanbantay ti biktima a ni Patrolman Baggay ken ti kadwana a ni Patrolman Robert Gregorio iti asideg ti gate ti Benigno Aquino Elementary School idiay Katuparan St., Brgy. Commonwealth kas paset ti ipatpatungpalda a police visibility idi nakangngegda iti putok ti paltog.
Dagus a nagreponde dagitoy ken iti uneg ti 30 a segundo ket nakadanunda iti nasao a lugar ngem adda ti nasabat ni Patrolman Baggay a maysa a lalaki a maatap a nangitudo iti direksyon a timmarayan ti suspek.
Idi timmalikod ni Baggay tapno surotenna koma ti suspek ket dagus met daytoy a pinaltugan ti nasabatna a lalaki a maysa gayam a holdaper.
Nupay nagsagrap ni Baggay iti sugat ket nabaelanna latta a nagbales ken pinaltuganna ti suspek.
Dagus met a tinulongan dagiti nagresponde a pulis ni Patrolman Baggay ken pinapatukanda ti holdaper a nangitunda iti ipupusay daytoy.
Naduktalan a sakbay ti engkwentro ket hinoldap ti suspek ti biktima a ni alyas “Sonny” ken pinaltuganna ti kanigid nga abagana bayat a natamaan met iti ligaw na bala ni alyas “Irah”.
Naitaray met dagitoy iti ospital ngem naideklara a dead-on-arrival ni Patrolman Baggay.
Iti agdama ket agtultuloy ti kanayonan nga imbestigasyon dagiti awtoridad maipapan iti napasamak a krimen.
Kabayatanna, impeksa met ti Quezon City Police District ti panakipagriknada iti pamilya ni Baggay ken binigbigda ti kinabanuar ti pimmusay a pulis.
