Makaaw-awat ita iti pammadayaw ni PLTCOL. Jack Angog, chief of police ti Tabuk City Police Station kalpasan a tinulonganna ti maysa a single dad nga immunan a naipadamag a nagtakaw idiay Tabuk City, Kalinga itay nabiit.
Imbes nga ibalud ni PLTCOL. Angog ti maysa nga ama kalpasan a natiliw gapu iti panagtakawna iti maysa a karton a gatas iti uneg ti supermarket ket winayawayaanna daytoy tapno maipaayan iti gundaway nga agtrabaho iti nasayaat a wagas.
Naduktalan iti imbestigasyon a nagtakaw iti nasurok maysa a kilo a gatas ti saanen a nainagannan nga ama tapno adda ti ipagatasna iti maladaga nga anakna.
Inaklon ti suspek nga inaramidna ti panagtakaw gapu ta awan ti trabahona sipud nagleppas ti maysa a construction project ken isuna laeng ti agbambantay iti anakna gapu ta pinanawan daytoy ti asawana.
Saan a nalapdan ni Sub-Station 2 Police Chief LtCol. Jack Angog a makarikna iti asi iti nasao nga ama isu’t gapuna a binayadanna ti gatad ti nakataw a gatas tapno saanen a maibalod daytoy Ken tapno maipaayan iti gundaway nga agrugi manen.
Karaman ni Acting Chief PNP Lt. Gen. Jose Melencio Nartatez Jr. kadagiti nangdayaw iti inaramid ni Angog nga adda dagiti gundaway a ti panagaramid iti dakkes ket gapu iti kinarigat wenno panagbisin ngem saanna kayat a saoen a kanunungan ti saan a napintas nga aramid.
Imbes met a makaawat iti ado a pammabalaw ti nasao nga ama ket ado ti nakisimpatya kenkuana Ken dinayawda ti panangipategna iti anakna iti baet a maysa daytoy a single dad.
