BAGUIO CITY- Agtaltalinaed a comatose ti pulis nga ama ti pamilya a nairaman iti aksidente a panakatnag ti lugan iti rangkis iti deppaar ti Benguet–Nueva Vizcaya Road, partikular iti nagbeddengan ti Adonot, Ambuklao, Bokod ken Guisit, Tinongdan, Itogon iti probinsia ti Benguet itay nabiit.
Sigun kenni PSI Vicente Tamid-ay, hepe ti Bokod PNP, adda iti estado ti comatose ni SPO3 Joefel Benito Layno, 43-anyos, driber ti naaksidente a lugan ken kameng ti Bambang PNP.
Kinunana a natalged ken nakaruar metten iti pagagasan da Juith Layno, 30-anyos kenni Joreich Layno, 2-anyos bayat a naiyawiden iti pagtaenganda sadiay Bambang, Nueva Vizcaya dagiti bangkay ti tallo a kameng ti pamilya a pimmusay kabayatan ti aksidente.
Maipalagip nga iti imbestigasyon ket nagtaud ti luganda a Hilux ditoy siudad ti Baguio ken paawiden dagitoy sadiay Nueva Vizcaya idi napasamak ti aksidente.
Dinakamatna a posible a mechanical deffect ti rason iti panakatnag ti lugan iti rangkis nga addaan iti kauneg nga agarup 50 a metro.
