BAGUIO CITY – Manarimaan ita ti panakikoordinar ti Baguio City Police Office (BCPO) iti transport group, pakairamanan dagiti drivers ken operators dagiti taxi ditoy lokalidad para iti angayenda a taripnong.
Sigun kenni PSSupt. Ramil Saculles, dadaulo ti BCPO, ditoy a pagsasaritaanda no anya dagiti kapintasan a maitulong ti pulisya tapnu maaksionan dagiti insidente a pakabikbiktimaan dagiti taxi drivers kas iti kaudian a panakapapatay dagiti dua a taxi drivers.
Innayonna nga iti personal nga opinyonna ket saan met a nadanun ti lebel a nasken a maalarma dagiti taxi drivers gapu iti napaspasamak.
Nupay kasta, kinuna ni Saculles a napimpintas no un-unaandan dagiti mabalin a mapasamak nangruna ta dimtengen ti nalam-ek a klima ken ti masansan a panag-arbis iti rabii a mangituntunda met tapnu agbalin a vulnerable dagiti lugan iti hold-up, bukas-kotse ken dadduma a related incidents.
Gapu iti daytoy, kidkiddawen ti BCPO ti panangipaay dagiti umili ti siudad iti nawadwad nga impormasyon iti pulisya tapnu maamuanda dagiti istratehiya dagiti managdakdakes.
Kinuna ni Saculles a daytoy ket gaputa kaaduan kadagiti kaso ti BCPO ti narisut babaen kadagiti impormasyon a nagtaud kadagiti umili.
Kabayatanna, insingasing ti Dumper Philippines Taxi Drivers Association – Cordillera Chapter ti panakaisubli dagiti checkpoints kadagiti babbarangay ditoy lokalidad nga imaton wenno bantayan dagiti mismo a bumaranggay.
Sigun kenni James Bolinao, presidente ti grupo, dakkel daytoy a katulongan dagiti checkpoints nga ipatpatungpal met dagiti pulis kadagiti kangrunaan a kalkalsada.
Dinakamatna a no agtultuloy dagiti checkpoints kadagiti babbarangay ket maksayan dagiti insidente ti panakabiktima dagiti taxi drivers babaen kadagiti pasahero dagitoy.
Inaklonna a saan nga amin a lugar iti lokalidad ket mabantayan wenno mapwestuan dagiti pulis isut gapuna a nasken a dagiti barangay roads ket bantayan met dagiti maseknan a barangay.
Impeksana a ti kalkalikaguman ita dagiti taxi drives ken operators iti lokalidad ket ti panakatiliw dagiti mangbikbiktima kadagitoy ken ti panakanayon dagiti addang tapnu mabantayan dagiti nasao nga insidente ken saanen a mapasamak manen.
