BAGUIO CITY – Mabigbig ita nga aldaw dagiti dadduma a lugar iti siudad ti Baguio a nasken a mawarasan iti pulis tapnu adda ti mangigiya kadagiti motorista nga agturong iti Philippine Military Academy para iti Alumni Homecoming sadiay inton bigat, aldaw ti Sabado.
Sigun kenni PSupt. Armando Gapuz, dadaulo ti Traffic Management Unit ti Baguio City Police Office, agarup “in-place” metten dagiti dadduma a signages nga agserbi a traffic advisory tapnu maalalayan dagiti sangaili nga agtaud kadagiti dadduma a lugar.
Innayonna a babaen iti traffic advisory ket ammo dagiti sangaili manipud lowlands dagiti nasken a turongenda tapnu saanda unay a matrapik no apanda iti PMA.
Kinunana nga adda met ti augmentation force a tumulong iti panakaiwanwan ti trapiko ken tumulong a mangipaay iti seguridad kadagiti sangaili inton Sabado.
Immunan a kinuna ti Cordillera PNP a dumanon iti 485 na pulis ti agbantay iti PMA Alumni Homecoming no sadino, 284 kadagitoy ti agtaud iti BCPO, 81 iti Regional Public Safety Company ken 120 dagiti Field Training Police.
