BAGUIO CITY- Inlawlawag ni Atty. Leticia Clemente ti City Budget Officer ti Baguio City, dagiti rason maipapan kadagiti sumagmamano a komento dagiti indibidual mainaig iti mapangpanggep a panagutang para iti rehabilitation ti sewage treatment plant idiay North Sanitary Camp, Baguio City.
Iti interview ti Bombo Radyo kenkuana, kinunana a nakabudget dagiti cash wenno ti pundo ti siudad a nakaidulin iti bangko isu’t gapuna a ti napanunut dagitoy a solusyon tapno matarimaan ti sewage treatment plant ket ti umutang.
Impettengna a daytoy ti umuna a solusyon tapno masolbar ti nabayag a parikut iti uneg ti siudad, agsipud ta para metlaeng daytoy iti pagsayaatan dagiti tumunggal maysa.
Nupay kasta, impeksana a tapno mabayadan ti mapangpanggep a mautang nasken nga agbayad dagiti households iti siudad ti 16% a kanayunan a bayad manipud iti binulan a water bill dagitoy bayat a dagiti business sectors ket agbayadda met ti 18% manipud metlaeng iti binulan a water bill dagitoy.
Malaksid iti dayta, mapangpanggep pay nga agbayad dagiti turista ti environment fee-da no sadino P100 ti bayadan ti tunggal indibidual.
Kabayatanna, tapno malawlawagan dagiti umili, panggep ti city council a mangisayangkat ti public consultation tapno maamuan ken maala dagiti kapanunutan dagitoy.
