BAGUIO CITY – Agkurkurang ita ti manpower ti Land Transportation Franchising and Regulatory Board (LTFRB) nga agresponde kadagiti amin a pakaseknan ti opisina dagitoy.
Inaklon daytoy ni LTFRB-Cordillera Regional Director Engr. Lalaine Sobremonte iti panaki-uman ti Bombo Radyo Baguio.
Sigun kenkuana, kurang dagiti transport marshals ti ahensiada nga agrikrikos kadagiti staging areas wenno terminal dagiti para-publiko a lugan iti siudad ti Baguio.
Kinunana nga iti agdama ket tallo laengen ti transport marshals nga agwanwanawan kadagiti para-publiko a lugan kalpasan a nagpaso ti kontrata ti pito a kakadwada idi napalabas a bulan.
Gapu iti daytoy, dinakamatna nga agal-alada ti augmentation manipod kadagiti empleyado ti LTFRB-CAR para iti panakawanawan no masursurot kadagiti para-publiko a lugan ti 70% capacity.
Sigun kenkuana, agtultuloy latta ti nainget a panagwanawanda kadagiti para-publiko a lugan tapno maliklikan ti panaglabsing kadagiti nagduduma a paglintegan mainaig iti panagbiahe dagitoy.
Kabayatanna, dinakamat ni Engr. Sobremonte nga iti datos ti ahensya iti pakabuklan ti napalabas a tawen 2021 ket napatawan ti multa ti dua a lugan gapu iti overloading, tallo a lugan gapu iti overcharging, siyam a drivers gapu iti arrogant driving ken tallo a drivers gapu iti panagkedkedda nga agilukan ti pasahero.
Naipaayan pay iti ballaag ti 14 a lugan gapu iti overloading, 48 a drivers gapu iti overcharging, lima iti refusal to convey passengers, siyam iti arrogant driving, pito iti illegal parking, innem iti panaglabsing iti health protocol ken uppat iti reckless driving.
