BAGUIO CITY – Nanayonan ti pwersa ti pulis nga agbambantay ita kadagiti border control checkpoints ken dadduma a quarantine facilities sadiay Mankayan, Benguet.
Sigun kenni Benguet Provincial Director PCol. Elmer Ragay, kasaruno daytoy ti naduktalan a panangilibas ti maysa nga ina iti COVID-19 positive nga anakna nga adda iti isolation facility sadiay Lepanto, Mankayan ken iti panagawidda sadiay Talubin, Bontoc, Mountain Province.
Kinunana a posible a naaramid ti ina ti nasao a banag gapu iti amak daytoy iti pagbanagan ti anakna nga addaan ti congenital heart disease bayat nga adda iti nasao nga isolation facility.
Dinakamatna a nabirukanen ti agina ken naipasidongen iti lockdown ti pamilyada ken dagiti dadduma a nakapulapolda sadiay Talubin, Bontoc.
Mangnamnama pay ni Col. Ragay a babaen iti kanayonan a pwersa ti pulis sadiay Mankayan ket nainget a mabantayan dagiti checkpoints ken awanen dagiti makaruar pay sadiay kagiddan ti maob-obserbaran a panagngato ti kaso ti COVID-19 iti nasao a munisipyo.
Inaklonna metlaeng a sakbay ti panagadu ti kaso ti COVID-19 sadiay Mankayan ket addan dagiti agnanaed wenno makitatrabaho sadiay a nagawid iti nagtaudanda a probinsia wenno munisipyo.
