Inirekomenda ng Quezon City City Prosecutor’s Office ang pagbasura sa reklamo ni Atty. Manases Carpio, asawa ni Vice President Sara Duterte, laban sa ilang mambabatas at opisyal ng gobyerno kaugnay sa paglalabas ng kanilang bank transaction records.
Sa 23-pahinang resolusyon, sinabi ng prosecutor’s office na ang mga ginawa ng respondents ay may kaugnayan sa kanilang mga tungkulin bilang public officials at hindi maituturing na likas na imoral.
Kabilang sa mga respondent sina House Justice panel chair Gerville Luistro, dating senador Leila de Lima, at ilang party-list at district representatives.
Kasama rin sa reklamo sina BSP Governor Eli Remolona Jr., Insurance Commissioner Reynaldo Regalado, SEC Chairperson Francis Lim, at AMLC Executive Director Ronel Buenaventura.
Inireklamo sila ni Carpio dahil umano sa paglabag sa Bank Secrecy Law, Data Privacy Act, at Anti-Money Laundering Act.
Inihain ni Carpio ang reklamo noong Abril at nagsumite ng supplemental complaint noong Hulyo.
Samantala, patuloy na hinaharap ni Vice President Duterte ang impeachment charges kaugnay sa umano’y culpable violation of the Constitution, graft and corruption, betrayal of public trust, bribery, at iba pang high crimes.
