Naituding a mangrugi ti ramadan para kadagiti Muslim Community iti Pilipinas ken kadagiti dadduma a pagilian inton bigat.
Iti pannakiuman ti Bombo Radyo kenni Shams Suddin Monib, President ti Baguio-Benguet Muslim Association,kinunana a napaay dagitoy a makaimatang iti bulan idi nangipatungpalda iti moonsighting idi kalman rason a naitantan daytoy.
Ti panagparang ti bulan ti mangipamusidaag a mabalin a rugyan ti maysa a bulan a pannakaipatungpal ti ramadan wenno panag-ayunar.
Nupay kasta, nangrugi ti ramadan ita nga aldaw kadagiti dadduma a pagilian kas ti Malaysia, Brunei ken kadagiti dadduma pay a pagilian.
Kagiddan dayta, inlawlawag ni Monib dagiti pagalagadan dagitoy no sadino adda dagiti mailaksid a saan a makipaset iti ramadan wenno panagayunar daytoy ket dagiti babbai nga addaan iti menstraution ngem kalpasan metlaeng ti ramadan ti kasapulan metlaeng a bayadanda daytoy iti panagayunar metlaeng.
Malaksid iti dayta, mailaksid metlaeng dagiti natataengan a saan a makabael nga agayunar ngem bayadanda daytoy babaen iti panangipaayda iti pagkasapulan ti maysa a pamilya.
Kasta metten dagiti agbibyahe a saan a makaayunar ket kasapulan metlaeng a bayadanda babaen metlaeng iti panagayunar kalpasan ti ramadan.
Sigun kenni Monib, mangrugi ti panagayunar iti alas singko iti agsapa agingga iti alas sais iti rabii, no sadino maipawil ti mangan, uminom iti danum ken dadduma pay a taraon.
Maipawil metlaeng nga aglukat dagiti muslim nga addaan iti restaurant ngem mabalin met a mailaksid daytoy la ketdi saan a mangan dagiti kapada a muslim nga agdama nga agay-ayunar.
Kabayatanna, nagpalagip met ni Monib kadagiti kapada daytoy a Muslim a suruten dagiti pagalagadanda seknan ti ramadan, agbalbaliw iti saan a nasayaat nga aramid ken dadduma pay.
