Kimmasa ti nangpaam-ammo a sigud a “bag man” ni Vice Presidents Sara Duterte a ni Ramil Madriaga iti panangkarit kenkuana ni Davao City Mayor Sebastian “Baste” Duterte.
Iti maysa a surat nga impatulod ti abodago daytoy a ni Atty. Raymund Palas, naiparang ti nagbalin a sungbatna iti panangkarit ni Baste kenkuana.
Sigun kenni Madriaga, mapagundawayan unay daytoy gapu iti panangkarit kenkuana ti maysa nga anak ti sigud a presidente.
“I’m so honored to be challenged by a former presidential son into a fistfight,” sigun kenni Madriaga iti nasao a surat.
Nupay kasta, inyebkasna iti surat dagiti mannarimaan a kasasaadna no sadino addaan daytoy iti limitado a garaw, nakabalud, ken addan daytoyen iti edad a 58.
Insingasingna iti mayor a ti karitenna laengen ket dagiti kaedad ken kadakdakkel daytoy.
Iti baet dayta, impeksa ni Madriaga a nakasagana daytoy a makilaban kenkuana ngem iti kondisyon a maresolba pay umuna dagiti kaso a sangsangwenna.
Kas alternatibo, insingasingna a maisayangkat ti laban dagitoy idiay Annex 2, Camp Bagong Diwa, no sadino ti nakabaludanna.
Maipalagip a nangrugi ti panagsinumbat dagiti duwa kalpasan a kinarit ni Mayor Baste ni Madriaga iti “no holds barred” a boksing ni Madriaga gapu iti pannakadamat ti naganna iti supplemental affidavit a naiparang iti House Justice Committee seknan iti impeachment proceedings kontra kenni Vice President Sara Duterte. //bombokaren.c.s
