BAGUIO CITY – Imbinglay ni Nicole A. Gonzales, ti rank no. 1 iti kaleppas a May 2024 Licensure Examination for Certified Public Accountant a nagreview daytoy iti namindua a daras tapno masigurado-na a karaman kadagiti topnotchers iti nasao nga eksaminasyon.
Iti exclusive interview ti Bombo Radyo kenni Gonzales, saanna a ninamnama a magun-odna ti rank 1 gapu ta pinanggepna laeng ti makastrek iti Top 10.
Nalaos met ti ragsak daytoy idi maamoanna ti resulta babaen ti panag-awag ti maysa a personnel ti review center a nagadalanna.
Sigun kenni Gonzales, emosyonal ti tatangna idi naammoanda ti resulta nangruna ta nagturpos daytoy iti Bachelor of Science in Accountancy ngem saan a naipaayan ti gundaway nga agreview ken makipaset iti board exam.
Iti pananggun-od ni Gonzales iti nasao a rangko, kinunana a dimmanon iti agarup maysa a tawen ti panagreviewna iti baet dagiti karit a narikna-na iti bagi-na.
Innayona pay a dakkel a tulong ti panagreviewna gapu ta kaaddoan kadagiti nabasa-na ket rinumwar iti Licensure Examination for Certified Public Accountant.
Mainaig iti dayta, saan met nga inlibak ni Gonzales a numero uno nga inspirasyonna ti Namarsua iti aniaman a panagballigi ken panawen ti panakaabak daytoy.
Dakkel pay ti panagyamanna kadagiti nagannakna, church family, pagadalanna, ken daduma pay a nagsakripisyo, nangtulong ken nangipaay ti suporta kenkuana bayat ti panagadal ken panagreview daytoy.
Kabayatanna, kinunana kadagiti ag-board exam a nasken ti panagtalek iti Apo, ti panagipaay iti kabaelan ken ti saan a panagdua-dua kadagiti konsepto nga inadalda.//Bombo Mera Pacpacan
