LA TRINIDAD, BENGUET – Inlawlawag ti Municipal Legal Officer ti La Trinidad nu apay a saan a natuloy ita nga aldaw, Hunyo 19 ti pannakademolish ti maipatpatakder a balay ni Oscar Dodon idiay Beckel, La Trinidad, Benguet.
Sigun kenni Atty. Victor Singa, idi nangipatungpal dagitoy iti pre-demolition conference ket adda dagiti sumagmamano nga isyu a nakita a kasapulan nga iberipikarda pailaeng sakbay a mademolish tapno maipatungpal ti due process.
Dinakamatna a maysa nga iberberipikarda ket ti tax declaration nga insubmitir ni Dodon iti maseknan nga ahensiya ti gobierno nu ti baybayadanna a buis ket ti maipatpatakderan ti balayna idiay Beckel wenno iti sabali a lote agsipudta sigun kenkuana ket sakop daytoy ti 30-meter reserved right of way.
Inlawlawag ni Atty. Singa a ti tax declaration ket awanan iti technical description iti lokasyon ti lote ngem no mapaneknekan a pudno ti tax declaration ni Dodon ket kasapulanna laeng nga agaplikar iti building permit ngem agbayad iti penalty.
Nu met mapaneknekan nga iligal ti pannakaipatakder ti balay ket mademolish daytoy iti kabiitan a panawen.
Immunan a kinuna ni Atty. Singa a namin-ado a daras a naipaayan ni Dodon iti notice of violation seknan iti panangbakbak dagitoy iti parapet iti baet nga awanan dagitoy iti building permit, ken tunggal aldaw a maipapaayan daytoy iti traffic citation ticket.
Impetteng pay ni Atty. Singa a dagiti nasao a notices ket inawat a mismo ni Dodon.
Nupay kasta, impatangken met ni Dodon iti interview ti Bombo Radyo kenkuana nga awan ti naaw-awatna a notice of violation ken reklamo.
Maipalagip nga itay nabiit ket naireklamo iti istasyon ti Bombo Radyo dagiti nakaparada a lugan iti igid ti kalsada idiay Beckel, La Trinidad a kukua ni Oscar Dodon nu sadino mangituntunda daytoy iti obstruction.
Iti met panagturong ti Bombo News Team iti nasao a lugar ket adda metlaeng ti maipatpatakder nga istruktura malaksid kadagiti luglugan a nakapadara ngem kinuna ni Dodon a kukuana ti nasao a lote ken naikkat metten dagiti nakaparada a luglugan.//Bombo Genzel Depayso
